Пасйисны Слава орденöн

Скöрöдумысь менам пöльлöн вок, Афанасий Иванович Липин, кодi чужлiс 1924 воын, пуктiс юрсö война вылын 1944 воын. Афанасий Иванович — младшöй сержант, снайпер, ас бöрсяыс кыпöдлiс тыш вылö мукöдöс. Збойлунысь пöльлысь воксö пасйылiсны коймöд тшупöда Слава орденöн, мый йылысь ме тöдмалi интернетысь корсьысигöн. Сэсся Ида Егоровна Жангурова сетiс Афанасий Ивановичлысь фронт вывсянь письмö, кодöс ыстылöма 1943-öд вося сентябрь мöдöд лунö Мелания чойыслы (Ида Егоровналöн мамлы). Афанасий пасйö, мый кыкысь нин доймылiс, мый олö оз бура, снайперъяс быд лун дасьтысьöны пемыдсянь пемыдöдз, олöны му улын, ёна мудзöны. Юасьö рöдвуж йылысь, оз-ö тшыгьявны, кодöс нин босьтiсны армияö, сиö став бурсö да виччысьö вочакыв.

Награднöй листысь ме тöдмалi, мый Афанасий Иванович 1944 вося июль 4-öд лунö Вилейскöй областьса Мерыын медводз воöдчис немечьяс дорöдз, лыйис офицерöс да бöрынджык контузитчис. Таысь сiйöс июль 19-öд лунся гижöдöн шуисны пасйыны Слава орденöн. Приказсö лэдзисны июль 24-öд лунö, кор Афанасий Иванович эз нин вöв ловъя, усис июль 13-öд лунö, гуыс Витебск обласьтса Плавники сикт дорын.

Унатор тöдмалi Великöй Отечественнöй войнаса герой йылысь, сöмын оз тырмы Афанасий Ивановичлöн фотоыс (некысь эз сюр). Да и Слава орден эз во Скöрöдумса рöдвужöдз. Кыдзи висьталiс Ида Егоровна, Помöсдiнса сиктсöветын шулöмаöсь, мый «Липинлöн некод абу» (та йылысь И.Е. Жангурова гижлiс нин 2012-öд волöн май 5-öд лунся «Парма гор газетын). И век жö кута лача, мый отсалас военкомат.

Юлия ПАШНИНА

Скöрöдум.

Снимок вылын: фронт вывсянь письмö.

Парма гор, 2015, Апрель 18 лун.